الموت هين والبلا وش ورا الموت
عند الحساب يهمون سهم المنايا
باكر نموت وتصبح قبورنا بيوت
وعقب القصور لضيقات الزوايا
في جوف الارض وكل من حولنا سكوت
وتعاقبنا بالقبر عوج الحنايا
يارب يامنجي نبيك من الحوت
سترك وعفوك يوم كشف الغطايا
باكر ليا جينا على داعي الصوت
شياب واطفال وشباب وصبايا
نسعى وحنا بين باكي ومبهوت
رحنا لها ننقاد مثل السبايا
يارب تهديني قبل لحظة الموت
وتغفر ذنوبي ياكريم العطايا
اشكيك هم داخل القلب مكبوت
وايامي اللي بالخطايا ملايا
ان لاذ بك من كان ضايع ومبهوت
في من يلوذ المرتكب للخطايا
يارب ياقادر على كل طاغوت
لا ياقف اللي وحدوبك خزايا
رحماك لامنا صحينا من الموت
واليا وقفنا عند بابك عرايا